Nei, men Nærum! Jon Almaas sender deg snart lapp. Aftenposten er blitt nokså spesiell på fargesida. VGs preposisjonering er interessant. Dagsnytt er landkrabbe-land. Portrettskriving er kunsten sin, det. Alt om dette og meir til i språkspalta.

Farginga

Aftenposten: ”NASA har sendt ut dette spesielle silhuettbildet av romfergen ’Endeavour’ der den flyr over den fargefulle horisonten av Jorden. Bildet ble tatt av en astronaut på Den internasjonale romstasjonen (ISS) før ’Endeavour’ nådde frem til romstasjonen.”

Eg trur avisa brukar Googles omsetjarverkty no. Billig i drift, og det treff nesten. Av og til.

Merknad til trøytte lesarar: Det heiter fargerik, eventuelt fargesterk.

Preposisjonen

For eller etter? Lesaren min i Stryn seier at det gjeld å halde styr på preposisjonane. Ikkje minst i kriminalsaker. VG Nett skriv: ”Fengslet etter drap på kjæresten”.

– Då har dei vel eigentleg førehandsdømt mannen, ved å seie at han er fengsla etter å ha drepe kjærasten sin? Av ingressen går det fram at han er varetektsfengsla, sikta for drapet. Tittelen burde ha vore: ”Fengslet for drap på kjæresten”.

Inspirasjonen

Treng du skriveinspirasjon? Ein dytt i rett retning? Ein god start er bøkene Sjanger, Pressespråket og Tekst & foto, som du kan bestille direkte her på www.komma.no

Bøkene kan være i postkassa di i god tid før helga!

Fisket

Helgeland Arbeiderblad melder at isfiskar Regine (10) hadde ”en tung jobb med å borre hull”. Det heiter å bore.

Påminninga

Ikkje ”eit hundretals”, men ”rundt hundre”

Vrien

Portrettintervju er ein vrien sjanger. Tre tips:

1. Avslutt teksten med den same detaljen som du starta med.

2. Sprei gode sitat og poeng utover, heller enn å bruke opp alle i dei fire-fem første avsnitta.

3. Vis det, ikkje fortel det. Her er eit ferskt døme på det siste: ”Ekte. Det er et ord som passer Kari Rindahl tromsøjente, hun er en ekte kunstner og et ekte medmenneske. Men ordet kan også stå alene om henne, fordi hun tvers gjennom virker ekte. Hun kan ikke late som, hun bare er slik hun er. Endresen. Hun er ekte”  Lesaren har berre journalistens gjentaking å halde seg til her. Det held neppe.

Slitet

Dagsavisen melder Det Norske Teatrets ”Familien”: ”… han bor sammen med sin pilleavhengige kone Vivian i dette slitne huset”. Berre levande vesen kan vere det. Hus er slitt.

Kurset

Skrivekurs, kanskje? Eller berre litt assistanse med tekstane? Skriv "hjelp!" til  Denne epostadressen er beskyttet mot programmer som samler epostadresser, du må slå på Javascript for å kunne se den. og  send!

Regelen

Det heiter straffeloven med liten s. Kvifor? Fordi det ikkje er det eigentlege namnet. Det er: ”Lov om den almindelige borgerlige Straffelovs Ikrafttræden".

Lossinga

Å losse er å tømme skip for last. Det veit ikkje landkrabbane i Dagsnytt: ”Skip kan nå igjen losse av i havna i Port-au-Prince.”

Nyfeilen

Det finst journalistar som aldri skriv feil. Dei stavar rett. Bommar ikkje på namn. Dei skil mellom transitive og intransitive verb. Likevel går det gale, no som korrekturleddet er vekk. Dagbladets meldar demonstrerer feilen her, i kritikken av teaterstykket ”Kalenderpikene”: ”Skuespillet er svært løst basert på den virkeligheten historien”.

Slikt skjer når du omformulerer utan å sjekke kva som heng att frå det første forsøket.  Løysing: La ein kollega sjå over, før desken smeller saka på.

Morgonstellet

– Kvar morgon under barberinga seier eg til meg sjølv: ”ein design, eit tapet”. Om att og om att, melder lesaren min på Tjøme.

Knuten

Melding til Knut Nærum: Vi var fleire som høyrde deg servere svesismen ”geniforklart” i Nytt på nytt. Vi har sendt Jon Almaas lapp: ”Du blir aldri genierklært på denne måten, Knut”.  

Noesomismen

– Den meiningstomme samanbindinga ”noe som” er i ferd med å bli like irriterande som ”i forhold til”, seier lesaren min bak Slottet. Døme frå NTB: ”Den europeiske investeringsbanken (EIB) har sagt ja til å gi Saab et lån, noe som Spykers sjef Victor Muller anså som en forutsetning for at kjøpet skulle gå i boks.” Sett heller punktum. Skriv så ei heil setning.

Titlane

– Herlig i Nordlys, meiner tipsar Thor-Wiggo Skille: ”Det er ikke gull alt som glimrer. Det kan være Kråkesølv”. Reportasjen handlar om suksessbandet frå Bodø.

– Eg er mållaus av beundring, skriv Øystein Sande ved Høgskulen i Volda, om Aftenpostens ”Veivesenet får pepper for salt”. Men fleire andre aviser har visst hatt liknande – og like gode –  peppartitlar før tante kom seg ut på vegen.

Ogen

NTB 21. januar: ”De to polfarerne venter på og bli fløyet ut”.Bli er ein infinitiv. Då skal det stå å.

Meir? Meld frå til Denne epostadressen er beskyttet mot programmer som samler epostadresser, du må slå på Javascript for å kunne se den. ,  eller gå til Språkspalta på Facebook:

http://www.facebook.com/group.php?gid=63312604040&ref=ts

Øving 1: Sjå over teksten ein gong til. Set dobbelt så mange punktum. Det blir aldri nok.

Øving 2: Sjekk om sidemannen din veit skilnad på de og dem.